País convidado

Como cada ano, gústanos explorar outras linguas e culturas, outras literaturas e expresións artísticas, e nesta edición decidimos ter a Francia como país convidado. Teremos libros e filmes do país veciño, a través de franceses e francesas que xa son galegas, e que van compartir con nós as súas linguas (o francés e tamén o bretón), as súas lecturas clásicas e contemporáneas, mais tamén as súas músicas, as súas danzas e a súa gastronomía. E imos ter unha convidada moi especial, Marcelline Loup, da man do noso querido Orbil, que iredes sabendo quen é… Exploraremos a relación entre Galicia e Francia a través de múltiples actividades e ata teremos en galego un dos musicais míticos da escena mundial: Miserábeis, baseado nun dos clásicos da literatura francesa. As aventuras de Jules Verne, O Principiño, as fadas de Madame d’Aulnoy, e os habitantes da máis universal aldea gala creada por Albert Uderzo e René Goscinny andarán por todo o Pazo da Cultura cunha chea de propostas para a rapazada.