Todos os sábados do Salón deste ano comezámolos coa Hora do Conto, non hai mellor maneira, sen dúbida.
Na sesión de hoxe os amigos de Pavís Pavos contáronnos a historia da princesa do Courel e aprendemos que as cousas, ás veces, non son o que parecen. Tamén fixemos un fermoso taller coa cor como gran protagonista.
Di a lenda que quen non escoita o cuco anunciando a primavera non vai ter un bo ano. No Salón xa o escoitamos! Foi esta mesma mañá na sesión de música e contos dirixida a bebés de Marcelo Dobode e Bea Martínez. Cantamos, demos palmas e rimos ao compás da arpa de Bea e a voz de Marcelo. Unha fermosura que teremos de novo pola tarde.
Cris de Caldas e Xabi do Camiño trouxeron nun saquiño os seus libros preferidos para amosárnolos no Salón.
A “alterego” de Cris, a Bibliotecaria Estrafalaria, falounos das historias e os xogos que viven nos libros. Das personaxes que os habitan e das viaxes que nos axudan a emprender. Unha gozada de sesión con Xabi do Camiño na parte musical.
🎶”Eu quero, parararararararara, eu quero pan de broa. De broa quero pan!”🎶
Xogos, contos, cantos 🎶 e unha morea de actividades que espertan a nosa imaxinación e creatividade. Así pasamos a mañá no Salón.
